Es Hèstes e Pelegrinatges
 

HÈSTA MAJOR

Gessa hèstege era sua hèsta eth dia 29 de junh, en aunor ath sòn patron Sant Pèir, prumèr Papa deth cristianisme. Se hè era veneracion dera "Vera Crotz" a on se sauven es reliquies deth Sant, se benedís eth pòble entà que Sant Pèir ac sauve de tot mau.Tanben s'invòque a Sant Pèir entà qu'es gossets non patisquen pas eth mau dera ràbia.

Es gojats e gojates que formen era Comision de Hèstes apolidissen eth pòble,s'encueden des orquèstres, de hèr tòies e de premanir jòcs entara mainadèra tamb era collaboracion dera gent deth pòble. Hèsta que se demore cada an, tamb fòrça gaujor.

 

PELEGRINATGE A SANT MARTIN DE CORILHA

Aguest pelegrinatge se hestejaue antigament eth 11 de noveme, dia dera hèsta deth Sant, mès coma fòrça còps non se podie pas hèr pes nheuades, se trasladèc ath dusau dissabte de junh.

 

Tot eth pòble puge tara montanha de Corilha, a on se trapen es restes dera ermita de Sant Martin, laguens d'ua ròca entà aunorar eth Sant e cantar-li es sons gòis: "Gòis en laudança deth gloriós Sant Martin".

Tara baishada a lòc era benediccion e eth despartiment dera caritat, que consistís en pan, vin e hormatge, aufrits a toti es assistents.

Tanben se sauva era caritat entà toti aqueris que, gent grana o malauti, non an pògut pas pujar tara capèla.

Aguesta ermita se trape emplaçada a uns 1800 mètres de nautada. Era sua arribada se hè a pè, per un camin de herradura, en tot tardar ues dues òres.

 

PELEGRINATGE DERA VÈRGE DE MONTSERRAT

Entà començament deth carrèr Latori e ath cant damb era carretèra Comarcau 142 se trape era petita capèla dera Vèrge de Montserrat.

Aguest pelegrinatge se hè eth dia 27 d'abriu. Eth pòble baishe entara capèla en tot cantar es sòns gòis, e un còp aquiu se venèra era Vèrge.

PELEGRINATGE ENTÀ MONTGARRI

Eth pelegrinatge se hè actuaument eth dia 2 de junsèga, mès des de hè temps era gent de Gessa i a anat.

Temps endarrèr eth pelegrinatge auie un caractèr mès religiós, e era gent de Gessa i anaue en processon.

Er Ajuntament aufrie pan, vin e hormatge. E en un temps amassèc fòrça gent, mès a plaser anèc perdent eth sòn espendor.

Actuaument i torne a anar fòrça gent de tot a era Val. Entà dinar s'amassen en grops: familhes, amics... Tara baishada se forme en pòble de Gessa ua gran hèsta.