|
|
|
|
|
UN SHINHAU D'ISTÒRIA
Era Escòla Estudi Alejandro Casona ei ua escòla publica, d'estructura
ciclica, que depen deth Departament d'Educacion dera Generalitat de
Catalonha. Ei ubicada en pòble de Les, en carrèr des Banhs, e en terçon
de Quate Lòcs. Eth pòble ei sus ua nautada de 600 mètres, atrauessat
per arriu Garona, entornejat de nautes montanhes e damb un clima
atlantic. Damb ua lengua pròpia, era aranesa, a ua poblacion
d'apruprètz 1025 abitants des qu'era magèr part viu deth torisme,
comèrç e servicis, donques, era sua situacion geografica, ath costat
dera termièra de França e era proximitat des pistes d'esquí, atau ac
facilite.
Er Ajuntament collabore damb eth personau de servicis: còssos, limpiesa, manteniment des installacions…
Era prumèra escòla ère propietat deth municipi e la bastic er Estat
damb aportacion municipau er an 1927. Coma institucions complementàries
ar estudi i auie ua Granja Cooperatiua Escolara, ua imprenta e ua
bibliotèca Circulanta.
- Era Granja Cooperatiua Escolara ère situada a
on ei ara era Residència dera Generalitat en uns terrens qu'èren der
Ajuntament. Podien formar part d'aguesta Cooperatiua toti es escolans
matriculats en centre, e ex-escolans enquiara edat de 20 ans. Çò de mès
important ère qu'es madeishi escolans dirigien e controlauen era
Cooperatiua : es auti sòcis non auien vòt.
- Era imprenta comencèc a foncionar en temps dera
II Republica. Ère installada en aguest estudi e era sua utilizacion
auie un caràcter d'ensenhament complementari tàs escolans e tanben damb
finalitats d'orientacion professionau.
- Era bibliotèca circulanta se creèc, entre d'auti motius, entà estimular era aficion pera lectura.
I auie tres seccions: Pedagogia, Generau e Escolar, e tres grops
d'usuaris: Mèstres, Popular e Infantil. I auie un bibliotecari qu'ère
un mèstre de Les, pr'amor qu'era bibliotèca ère plaçada en nòste pòble;
es libres que se demanauen de dehòra deth pòble s'enviauen per correo.
I auie un plaç entà tornar eth libre que s'auie deishat e se non
tornaue en bon estat calie crompar-ne un aute o ben pagar çò que
costaue.
Entà estimular era aficion pera lectura, s'organizauen concorsi de
critica e resumits de lectures liejudes, articles e composicions
literàries e d'investigacion bibliografica, eca. entre es lectors dera
bibliotèca.
Er estudi ère un edifici damb dues classes, ua tà mainatges e ua auta
tà mainades, dus burèus, dus servicis e tanben dues viuendes : ua tath
mèstre e era auta tara mèstra.
Aguest estudi foncionèc coma tal enquiar an 1994 qu'ei quan s'inaugurèc eth nau edifici, plaçat ath costat.
Ath delà d'estudi era vielha bastissa auec diuèrses foncions: guarderia, minjador escolar, classes de grops flexibles,…
Alejandro Casona siguec destinat tà Les, coma Inspector Escolar peth
Ministeri d'Instruccion Publica er an 1928. Demorèc pendent tres ans en
pòble e en aguest temps, ath delà dera faena coma Inspector tanben
escriuec diferentes òbres literàries. Bèra ua d'eres se representèc
peth grop de teatre qu'eth madeish fondèc: "El pájaro pinto". Aguest
escrivan ei eth que da nòm ar actuau estudi.
Er an 2005 se comencèc a remodelar er antic edifici e se junhèc damb
era naua bastissa a trauèrs dera connexion; quedèc inaugurat er 11
d'abriu deth 2007.
|
|
|
|
|
|
