Fedre
FEDRE: AESOPI FABULAE
Liber I, fabula 1. LUPUS ET AGNUS
(Malefacere qui vult, nusquam non causam invenit)
Ad rivum eundem lupus et agnus venerant
siti compulsi; superior stabat lupus
longeque inferior agnus. Tunc fauce inproba
latro incitatus iurgii causam intulit.
«Cur», inquit, «turbulentam fecisti mihi
aquam bibenti?» Laniger contra timens:
«Qui[1] possum, quaeso, facere quod quereris, lupe?
A te decurrit ad meos haustus liquor.»
Repulsus ille veritatis viribus:
«Ante hoc sex menses male», ait, «dixisti mihi.»
Respondit agnus: «Equidem natus non eram.»
«Pater hercle tuus», ille inquit, «male dixit mihi;»
atque ita correptum lacerat iniusta nece.
Haec propter illos scripta est homines fabula,
qui fictis causis innocentes opprimunt.
I, 4. CANIS PER FLUVIUM CARNEM FERENS
(Aviditas sua saepe deludit avidum)
Amittit merito proprium, qui alienum adpetit.
Canis per flumen carnem cum ferret natans,
lympharum in speculo vidit simulacrum suum,
aliamque praedam ab alio cane ferri putans
eripere voluit; verum decepta aviditas
et, quem tenebat ore, dimisit cibum
nec quem petebat adeo potuit tangere.
I.5. VACCA ET CAPELLA, OVIS ET LEO
Potentioris societatem fuge:
Numquam est fidelis cum potenti societas;
testatur haec fabella propositum meum.
Vacca et capella et patiens ovis iniuriae
socii fuere cum leone in saltibus.
Hi cum cepissent cervum vasti corporis,
sic est locutus partibus factis leo:
«Ego primam tollo, nominor quoniam leo;
secundam, quia sum fortis, tribuetis mihi;
tum, quia plus valeo, me sequetur tertia;
malo adficietur, siquis quartam tetigerit.»
Sic totam praedam sola improbitas abstulit.
I. 6. RANAE AD SOLEM:
Soboles inproborum inproba.
Vicini furis celebres vidit nuptias
Aesopus et continuo narrare incipit:
Uxorem quondam Sol cum vellet ducere,
Clamorem ranae sustulere ad sidera.
Convicio permotus quaerit Iuppiter
causam querelae. Quaedam tum stagni incola:
"Nunc" inquit "omnes unus exurit lacus
cogitque miseras arida sede emori.
Quidnam futurum est, si crearit liberos?"
Liber I, fáb. 25 CANES ET CORCODILI
Rete ne tendeas accipitri
Consilia qui dant prava cautis hominibus,
et perdunt operam et deridentur turpiter.
Canes currentes bibere in Nilo flumine,
a corcodilis ne rapiantur, traditum est.
Igitur cum currens bibere coepisset canis,
sic corcodillus: "Quamlibet lambe otio;
noli vereri". At ille: "Facerem mehercule,
nisi esse scirem carnis te cupidum meae".
MUSCA ET MULA :
Ridenda imbecillorum superbia
Musca in temone sedit et mulam increpans:
"Quam tarda es!", inquit, "non vis citius progredi?
Vide ne dolone collum conpungam tibi."
Respondit illa: "Verbis non moveor tuis;
magistrum timeo sella qui prima sedens
tergum flagello temperat lento meum
et ora frenis continet spumantibus.
Quapropter aufer frivolam insolentiam;
nam et ubi tricandum et ubi currendum sit, scio".
Hac derideri fabula merito potest
qui sine virtute vanas exercet minas.
MULIER PARTURIENS
Nemo libenter recolit qui laesit locum.
Instante partu mulier actis mensibus
humi iacebat flebilis gemitus ciens.
Vir est hortatus corpus lecto reciperet
onus naturae melius quo deponeret.
"Minime", inquit, "illo posse confido loco
malum finiri quo conceptum est initium."
I. XXIV. RANA RUPTA ET BOS
Potentes ne tentes aemulari
Inops, potentem dum vult imitari, perit.
In prato quondam rana conspexit bovem
et tacta invidia tantae magnitudinis
rugosam inflavit pellem: tum natos suos
interrogavit, an bove esset latior.
Illi negarunt. Rursus intendit cutem
maiore nisu et simili quaesivit modo,
quis maior esset. Illi dixerunt bovem.
Novissime indignata dum vult validius
inflare sese, rupto iacuit corpore.
MULIER ET GALLINA.
Mulier quaedam habebat gallinam, quae ei quotidie ovum pariebat aureum. Hinc suspicari coepit, illam auri massam intus celare, et gallinam occidit. Sed nihil in ea reperit, nisi quod in aliis gallinis reperiri solet. Itaque dum majoribus divitiis inhiabat, etiam minores perdidit
VULPES ET UVA
Fame coacta uulpes alta in uinea
unam appetebat summis saliens uiribus:
quam tangere ut non potuit, discedens ait:
" Nondum matura est, nolo acerbam sumere"
Qui facere quae non possunt uerbis
eleuant, adscribere hoc debebunt